23:04 20 Oktyabr 2020
Efir
  • RUB133.19
  • EUR12153.63
  • USD10371.76
Yangiliklar
Havola olish
96450

Oʻzbekiston boʻylab oʻtkazilgan tezkor tadbirlar davomida, odamlardan minglab dollarlarni pora evaziga olayotgan mansabdorlar ashyoviy dalillar bilan qoʻlga olindi

TOSHKENT, 16 iyul - Sputnik. Oʻzbekiston DXX korruptsiya bilan bogʻliq bir nechta holatlarga chek qoʻydi, deb xabar berdi idora matbuot-xizmati.

Poslaniye prezidenta Uzbekistana Shavkata Mirziyoyeva Oliy Majlisu
Sputnik / Dilshoda Raxmatova

Xususan, Toshkent shahar Bektemir tumani hokimligining masʼul xodimi mahalliy tadbirkorga 4 ming AQSH dollari evaziga Yashnobod tumanidagi yer usti metrosi tagidagi boʻsh yerlardan tijorat maqsadida foydalanishi uchun rasmiylashtirib berishni vaʼda qilgan.

DXX Toshkent shahar Boshqarmasi xodimlarining shahar prokuraturasi bilan hamkorlikda oʻtkazgan tezkor tadbiri davomida mazkur shaxs talab qilingan pul mablagʻini olayotgan vaqtida ashyoviy dalillar bilan ushlangan.

Shuningdek, DXX Samarqand viloyati boshqarmasi va viloyat ichki ishlar boshqarmasi hamkorligida oʻtkazilgan tezkor tadbir davomida Samarqand iqtisodiyot va servis instituti dotsenti oʻzining vositachisi boʻlgan jinoiy sherigi bilan birgalikda mahalliy fuqaroni ushbu oliy oʻquv yurtiga oʻqishga kiritib qoʻyish uchun 10 ming AQSH dollari olayotgan vaqtida ushlangan.

Bundan tashqari, Samarqand viloyati Urgut tumani koʻp tarmoqli markaziy poliklinikasida ishlovchi shifokor Samarqand davlat tibbiyot institutidagi yuqori lavozimli tanishlari orqali 3 nafar fuqaroni mazkur oliy oʻquv yurtiga oʻqishga kiritib qoʻyish uchun 18 ming AQSH dollari olayotgan vaqtida ashyoviy dalillar bilan ushlangan.

Tezkor tadbir davom ettirilib, uning hamtavogʻi boʻlgan Respublika shoshilinch tibbiy yordam ilmiy markazining Samarqand filiali shifokori ham qoʻlga olingan.

Bu kabi holatlar Qoraqalpogʻiston Respublikasida ham kuzatilgan.

Jumladan, Nukus davlat pedagogika institutining fakultetlaridan birida dekan oʻrinbosari vazifasida ishlovchi shaxs Kegeyli tumanida yashovchi fuqaroga ushbu oliy taʼlim muassasasiga kirish imtihonlarida yordam berishni vaʼda qilib, undan 3 ming AQSH dollari olayotgan vaqtida DXX Qoraqalpogʻiston Respublikasi boshqarmasi va prokuratura xodimlari tomonidan qoʻlga olingan.

Mazkur institutning yana bir xodimi Beruniy tumanida yashovchi 4 nafar fuqaroning oʻqishga kirishlarida yordam berish evaziga ularning har biridan 2 ming AQSH dollaridan, jami 8 ming AQSH dollari talab qilib, soʻralgan pul mablagʻini olayotgan vaqtida ushlangan.

Buxoro davlat universiteti oʻqituvchisi Jondor tumanida yashovchi fuqaroni oʻqishga kiritib qoʻyishni vaʼda qilib, evaziga undan 4000 AQSH dollari olayotgan vaqtida DXX va Prokuratura xodimlari tomonidan qoʻlga olingan.

Hozirda aniqlangan barcha holatlar yuzasidan Jinoyat Kodeksining tegishli moddalariga asosan jinoyat ishlari qoʻzgʻatilib, tergov harakatlari doirasida ushbu noqonuniy ishlarga aloqador boʻlgan shaxslarni aniqlash boʻyicha zarur chora-tadbirlar amalga oshirilmoqda.

Eslatib oʻtamiz, Oʻzbekiston prezidenti Shavkat Mirziyoyevning Oliy majlis yangi chaqiriq deputatlariga murojaatnomasida korruptsiya illatiga toʻxtalar ekan, "jamiyaning barcha aʼzolari halollik vaktsinasi bilan emlanmas ekan - oʻz oldimizga qoʻygan maqsadlarga erisha olmaymiz. Eng katta masala halollik masalasini qayerdan olamiz? Korruptsiya bu oyogʻimizga solingan kishan", - deya qayd etgan edi. 

"Endi har bir tashkilotni, rahbarni mikroskop ostida kuzatamiz. Oldin faqat gap edi. Korruptsiya illatiga qarshi kurashish boʻyicha sadoqatli qattiqqoʻl rahbarni qoʻyamiz. Biz hozir uni tayyorlayapmiz",- deya taʼkidlagandi Oʻzbekiston prezidenti. 

Asosiy mavzular