O‘zbekiston qo‘shnilar bilan siyosiy ishonchni orttirdi - TIV hisoboti

TOShKENT, 25 dek — Sputnik. 2017-yilda Markaziy Osiyodagi qo‘shni davlatlar bilan munosabatlarda mutlaqo yangi siyosiy muhitni yaratishga, mintaqadagi siyosiy ishonchni sezilarli darajada oshirishga, hamkorlikning ko‘plab sohalarida yuqori natijalarga erishishga muvaffaq bo‘ldik, deb bayonot qildi O‘zbekiston Tashqi ishlar vazirligi.

"O‘tgan vaqt mobaynida mintaqa davlatlari rahbarlari bilan 20 dan ziyod uchrashuvlar, oliy darajadagi 10 ta davlat, rasmiy va ishchi tashriflari amalga oshirildi. O‘zbekistonning Markaziy Osiyo yo‘nalishidagi faol siyosati tufayli mintaqada nizo kelib chiqishi ehtimolligini oshiruvchi omillar deyarli bartaraf etildi. Markaziy Osiyoda mintaqaviy hamkorlikni chuqurlashtirish va kengaytirish, do‘stlik va ahil qo‘shnichilik muhitini yaratish g‘oyalari amaliyotga tatbiq etildi", — deyiladi hisobotda.

Bundan tashqari, mintaqadagi savdo-iqtisodiy, sarmoyaviy, sanoat-kooperatsion, transport-kommunikatsiya va madaniy-gumanitar hamkorlik jadal sur’atlarda rivojlanmoqda, chegaralarni delimitatsiya va demarkatsiya qilish, suvdan oqilona foydalanish masalalari yechimida sezilarli darajada olg‘a siljish kuzatilayotgani aytilgan.

Qozog‘iston bilan strategik hamkorlik yangi iqtisodiy kelishuvlar bilan mustahkamlangani, Turkmaniston va Qirg‘iziston bilan strategik sheriklik to‘g‘risida shartnoma imzolandi, Tojikiston bilan hamkorlikda esa ijobiy dinamikaga erishildi. O‘zbekiston va Qirg‘iziston o‘rtasida imzolangan davlat chegarasi to‘g‘risidagi Shartnoma tom ma’noda muhim voqea bo‘lib, bu ikki davlat rahbarlarining siyosiy irodasi sababli amalga oshdi, deyilgan bayonotda.

Shuningdek, Afg‘onistonning mintaqaviy iqtisodiy jarayonlarga faol jalb etilishi Markaziy Osiyoning barqaror va xavfsiz rivojlanishi asoslarining mustahkamlanishiga xizmat qiladi. Yaqinda Qobul bilan imzolangan savdo, transport, energetika va ta’lim sohalaridagi kelishuvlar ushbu davlat iqtisodiyotini qayta tiklash va uni barqarorlashtirishga muhim hissa qo‘shishi, mintaqa barqarorligini ta’minlash va ahil qo‘shnichilik munosabatlarini yo‘lga qo‘yish Markaziy Osiyoning investitsion jozibadorligini yuksaltirishga hamda umummintaqaviy darajadagi loyihalarni amalga oshirishga xizmat qilishi ta’kidlangan.