20:15 28 Fevral 2020
Efir
  • RUB148.82
  • EUR10329.35
  • USD9526.28
Siyosat
Havola olish
53910

Oʻzbekiston Oliy va oʻrta maxsus taʼlim vazirligi fevral oyining boshida qoʻshni davlatlardagi oliy taʼlim muassasalarida tahsil olayotgan Oʻzbekiston fuqarolari hech qanday imtihonlarsiz oʻqishini Oʻzbekistonga koʻchirishlari mumkinligi haqida xabar bergan edi

TOSHKENT, 14 fev - Sputnik. Oʻzbekiston tomonining qoʻshni davlatlar - Qozogʻiston, Qirgʻiziston va Tojikistondan talaba yoshlarni vatanga qaytarish boʻyicha harakatlari siyosiy maʼnodan mutlaqo holi. Bu haqda bugun jurnalistlar bilan oʻtkazilgan matbuot-anjumanida Oʻzbekiston Tashqi ishlar vazirining birinchi oʻrinbosari Ilhom Neʼmatov maʼlum qildi, deb xabar bermoqda Sputnik Oʻzbekiston muxbiri.

"...Qoʻshni davlatlarda tahsil olayotgan talabalarning oʻqishini Oʻzbekistonga koʻchirilishida mutlaqo bir siyosiy maʼno yoki siyosiy omil yoʻq. Ancha yillardan buyon farzandlari chet elda tahsil olayotgan ota-onalardan oʻz farzandining oʻqishini Oʻzbekistondagi oliygohlarga koʻchirishga imkon berish haqidagi talablarni eshitib kelamiz. Oʻzbekiston OTMlarida kvotalar oz boʻlib, bunday talabalarga bir marta yozda oʻqishni koʻchirishga ruxsat berilardi. Bu yil ota-onalarning talablaridan kelib chiqib, qishda ham oʻqishni koʻchirishga rozilik berildi", - deya tushuntirdi Neʼmatov.

Diplomatning aytishicha, mana shu jarayon boshlangandan beri, Oʻzbekistonning Tojikiston, Qirgʻiziston va Qozogʻistondagi diplomatik vakolatxonalari ushbu masala ustida tinimsiz muzokaralar olib borishmoqda.

"Bu juda murakkab masala. Misol uchun, birgina Chimkentning oʻzida 10 mingdan ortiq talabalarimiz tahsil oladi. Qirgʻiziston, Tojikistonda ham holat shunday. Elchilarimiz bilan har kuni gaplashaman, ularning oliygohlar rektorlari bilan muntazam aloqadaligidan xabardorman", - dedi u.

Taʼkidlanishicha, tez vaqtda Oʻzbekiston Oliy va oʻrta maxsus taʼlimi vaziri Qozogʻiston, Qirgʻiziston, Tojikiston OTMlari rahbarlari bilan uchrashib, muloqot qilishi kutilmoqda.

"Bu yerda turli muammolar bor. Misol uchun, talabaga bir semestrni tamomlamay turib, oʻqishni koʻchirishga ruxsat berilmasligi yoki agar oʻqish semestr yarmida koʻchiriladigan boʻlsa, bir yil uchun toʻlab qoʻyilgan kontrakt pulining yarmi qaytarilmasligi va shunga oʻxshash muammolar... Albatta, hozirgi kunda muzokaralar olib borilmoqda, oʻylaymanki, mana shu muzokaralar natijasida muammolarning hammasi hal boʻladi", - deb ishonch bildirdi TIV rahbarining birinchi oʻrinbosari.

Eslatib oʻtamiz, Oʻzbekiston Oliy va oʻrta maxsus taʼlim vazirligi fevral oyining boshida qoʻshni davlatlardagi oliy taʼlim muassasalarida tahsil olayotgan Oʻzbekiston fuqarolari hech qanday imtihonlarsiz oʻqishini Oʻzbekistonga koʻchirishlari mumkinligi haqida xabar bergan edi.

Ilgarilari oʻzbek talabalarida bunday imkoniyat boʻlmagan. Koʻngilli ravishda oʻqishni koʻchirish qarori, talabalar ota-onalari tomonidan oʻz farzandlariga moddiy yordam yuborishda yuzaga kelayotgan qiyinchiliklar tufayli qabul qilingan. Bundan tashqari, talabalarning ota-onalari qoʻshni mamlakatlardagi oliy dargohlardagi taʼlim sifatidan ham norozi boʻlganlar.

Asosiy mavzular