18:37 21 Oktyabr 2020
Efir
  • RUB133.19
  • EUR12153.63
  • USD10371.76
Siyosat
Havola olish
187 0 0

Oʻzbekiston va Qozogʻiston prezidentlari Qirgʻizistondagi vaziyat ushbu mamlakat Konstitutsiyasi va milliy qonunchiligi normalariga muvofiq tez fursatda barqarorlashishiga umid bildirdilar

TOSHKENT, 7 okt — Sputnik. Oʻzbekiston prezidenti Shavkat Mirziyoyev Qozogʻiston prezidenti Qasim-Jomart Toqayev bilan telefon orqali muloqot qildi. Bu haqda davlat rahbari matbuot xizmati xabar qildi.

“Mintaqadagi voqealar rivoji yuzasidan ham fikr almashildi. Oʻzbekiston va Qozogʻiston prezidentlari Qirgʻizistondagi vaziyat ushbu mamlakat Konstitutsiyasi va milliy qonunchiligi normalariga muvofiq tez fursatda barqarorlashishiga umid bildirdilar”, - deyilgan xabarda.

Davlat rahbarlari koʻp asrlik doʻstlik va yaxshi qoʻshnichilik rishtalari, ishonch va strategik sheriklik tamoyillariga asoslangan ikki tomonlama munosabatlarning holati va ularni yanada rivojlantirish istiqbollarini muhokama qildilar.

Koronavirus tarqalishi oqibatlarini tez fursatda yengib oʻtish maqsadida Oʻzbekiston va Qozogʻiston hukumatlari darajasida yaqindan muvofiqlashuv va faol almashinuvlar amalga oshirilayotgani mamnuniyat bilan qayd etildi.

Tovar ayirboshlash koʻrsatkichlarini oshirishga qaratilgan qoʻshma dastur va loyihalarni ilgari surish, tadbirkorlar va hududlarning yangi tashabbuslarini qoʻllab-quvvatlash orqali kooperatsiyani kengaytirish, shuningdek, madaniy-gumanitar tadbirlar oʻtkazishga alohida eʼtibor berildi.

Eslatib oʻtamiz, avvalroq Mirziyoyev Tojikiston prezidenti Emomali Rahmon bilan ham mintaqadagi vaziyat yuzasidan fikr almashgan edi.

5 oktyabr kuni Bishkekda parlamentiga oʻta olmagan partiyalar tarafdorlarining norozilik namoyishlari boshlandi. Oʻsha kuni kechqurun mitingni tarqatishga urinish vaqtida norozilik aktsiyasi namoyishchilari va kuch tuzilmalari oʻrtasida toʻqnashuvlar boshlandi. Mamlakat sogʻliqni saqlash vazirligi maʼlumotlariga koʻra, toʻqnashuvlarda 911 kishi jabrlandi. Bir nafari halok boʻlgan.

6 oktyabr kuni Qirgʻiziston MSK saylov natijalarini haqiqiy emas deb topdi.

Asosiy mavzular