TOShKENT, 10 mar — Sputnik. Rossiya Federatsiyasi Prezidenti kasbiy ta’lim muassasalari va oliy o‘quv yurtlarining kunduzgi ta’lim yo‘nalishida tahsil olayotgan chet el fuqarolari va fuqaroligi bo‘lmagan shaxslarni ish bilan ta’minlash tartibini soddalashtiruvchi qonunni imzoladi. Bu haqda Tashqi mehnat migratsiyasi agentligi matbuot kotibi ma’lum qilmoqda.
Joriy yilning 5-avgust kuni kuchga kiradigan ushbu yangi qonun hujjatiga ko‘ra, bundan buyon Rossiyada o‘qishini davom ettirayotgan chet el fuqarolari maxsus ruxsatnoma yoki patent olmasdan o‘zi istagan tashkilotlarda ishlashi mumkin.
Avvalroq esa chet ellik talabalar o‘zlari ta’lim olayotgan universitet va oliy o‘quv yurtlari tomonidan ta’sis etilgan tashkilotlarda patentsiz ishlashi mumkin bo‘lgan.
Bundan tashqari agar chet ellik talaba o‘qishni tugatgan yoki o‘z ixtiyoriga ko‘ra to‘xtatgan taqdirda, ishlashni to‘xtatish, mehnat yoki xizmat ko‘rsatish shartnomasini ham bekor qilish kerak.
