TOShKENT, 27 okt — Sputnik. Prezident Shavkat Mirziyoyev qurilish sohasidagi loyihalar taqdimoti bilan tanishdi. Bu haqda davlat rahbari matbuot xizmati xabar qilmoqda.
Loyihalardan biri Toshkent davlat texnika universiteti hududida zamonaviy o‘quv-amaliy kompleksi barpo etishga qaratilgan.
Rejalashtirilayotgan majmua ham shu hududdagi Toshkent davlat texnika universiteti, O‘zbekiston Milliy universiteti hamda Turin politexnika universitetidagi jami 36 ming talaba, 2 mingdan ziyod professor-o‘qituvchilar uchun shunday markaz bo‘lishi ko‘zda tutilmoqda. Bu yerda bir paytda 500 ta startap rezidentlari, 120 ta ishlab chiqarish korxonasini joylashtirish mumkin bo‘ladi.
Shuningdek, davlat rahbari Nukus shahrining istiqboldagi zamonaviy markazini barpo etish loyihasi bilan tanishdi.
Prezident ushbu loyihalar bilan tanishib, ularni takomillashtirish bo‘yicha qator ko‘rsatmalar berdi.
