TOShKENT, 3 dek - Sputnik. Sirdaryoning Mirzaobod tumanida "Ziyo" jome masjidi ta’mirlanib, yana foydalanishga topshirildi, deb xabar qilmoqda viloyat hokimligi va O‘MI.
Hashamdor ko‘rinishda yangilangan yangilangan masjidga 22 metrli gumbaz o‘rnatilgan bo‘lib, uning katta xonaqohida 500 kishi, ayvon qismida esa 200 kishi namoz o‘qishi mumkin. Avval masjid binosida 300-350 kishi joylashishi mumkin edi, - deyilgan xabarda.
Masjidning ochilish marosimida O‘zbekiston Musulmonlari idorasi raisi, muftiy Usmonxon Alimov, Din ishlari bo‘yicha qo‘mita raisi Abdug‘ofur Ahmedov va viloyat bosh imom-xatibi Habibulloh Zokirov, viloyatdagi imom-xatiblar, mutasaddi tashkilot vakillari qatnashdi.
Ma’lumot uchun, Mirzaobod tumani mas’ullari 1990-yilda “Oqoltin” mahallasida masjid uchun 15 sotix yer ajratgan. So‘ng mahalla faollari ko‘magi va aholi hashari bilan masjid qurilgan. 1998-yilda “Ziyo” jomesi rasmiy ro‘yxatdan o‘tkazilgan.
Keyingi yillarda ushbu masjid eski binosi yaroqsiz holatga kelib qolgani tufayli zamonaviy loyiha asosida zamonaviy dizayn va milliy uslubda yangidan bunyod etildi.
Shu yil fevral oyida boshlangan masjid qurilishi hozirda to‘liq yakunlangan. Masjid binosining uzunligi 18 metr, eni 22 metrni tashkil etadi. 22 metrli gumbaz esa jome binosiga o‘zgacha fayz bag‘ishlab turibdi.
