12:39 26 Fevral 2021
Efir
  • RUB141.09
  • EUR12773.52
  • USD10549.65
Jamiyat
Havola olish
334 0 0

Gidrometeorologiya xizmati xabariga koʻra 24-27 fevral kunlari Oʻzbekistonga Rossiyaning Volga boʻyi hududidan sovuq va nam havo kirib kelishi kutilmoqda.

TOSHKENT, 124 fev - Sputnik. Shu kunlarda kutilayotgan sovuq va nam havoda qishloq xoʻjaligi ekinlari va daraxtlarni qanday saqlash kerak? Qishloq xoʻjaligi vazirligi bu borada oʻz tavsiyalarini berdi. 

Eslatib oʻtamiz, Oʻzbekiston Gidrometeorologiya xizmati xabariga koʻra, 24-27 fevral kunlari Oʻzbekistonga Volga boʻyi orqali Rossiyaning Yevropa qismi hududlari ustida shakllangan sovuq va nam havo kirib kelishi kutilmoqda. 

Ushbu munosabat bilan, Qishloq xoʻjaligi vazirligi, mevali bogʻ va uzumzorlar, ertaki kartoshka va sabzavot ekinlarini saqlab qolish maqsadida quyidagi tadbirlarni zudlik bilan amalga oshirish tavsiya berdi:

  • mevali bogʻ va uzumzorlarning qator oralaridan sugʻorish ariqlari olinib, iloji boricha kam miqdorda suv oqizish;
  • mevali bogʻ va uzumzorlar qator oralariga mahalliy oʻgʻit aralash hashak, paxol, shox-shabbalar uyumlarini toʻplab, ularni tutatish. Buning uchun mevali bogʻ va uzumzorlarga bir tekisda eni 1,25-1,5 m hamda balandligi 0,5-0,75 m dan toʻp-toʻp qilib uyib qoʻyish;
  • daraxtlarning yoshi va qalin siyrakligiga qarab har bir gektar maydonga 100-200 ta uyum hosil qilish. Tutun bogʻ ichiga yaxshi yoyilishi uchun uyumlarni mevali bogʻ va uzumzorlarning shamol esadigan tomoniga qoʻyish hamda havo xaroratini kuzatib borish;
  • havo ochiq boʻlib, harorat +1°S ga tushishi bilan uyumlarni tutatish. Bunda uyumlarning alangalanmay, tutab yonishiga alohida ahamiyat berish lozim. Sovuq takrorlanishini hisobga olib, uyumlar oralatib tutatish. Agar sovuq boʻlmasa uyumlardan oʻgʻit sifatida foydalanish;
  • ertaki muddatlarda ekilgan kartoshka nihollari yerdan unib chiqqan boʻlsa, sharoitga qarab, egat ustini polietilen plyonka bilan yopish yoki yopishning iloji boʻlmagan maydonlarda kechki suv qoʻyishni tashkil etish va maydonning atrofiga goʻng aralash xashak, paxol va shox-shabbalar uyumlarini toʻplash hamda ularni tutatish;
  • isitilmaydigan koʻchatxonalarda yetishtirilayotgan sabzavot va poliz ekinlari koʻchatlarini sovuqdan asrashning muhim tadbirlaridan biri dugalar oʻrnatish, ustini polietilen plyonkasi bilan yopish, vaqtinchalik isitish moslamalaridan foydalanish hamda atrofiga goʻng aralash xashak, paxol va shox-shabbalar uyumlarini toʻplab, ularni tutatish;
  • issiqsevar sabzavot ekinlaridan pomidor, shirin qalampir va baqlajon koʻchatlarini parnikda tayyorlashni hamda bodring va poliz ekinlari urugʻlarini ekishni vaqtinchalik toʻxtatib turish;

Shu bilan birga vazirlik, sovuqqa chidamli sabzi, piyoz, sarimsoqpiyoz, osh lavlagi, karam va koʻkat sabzavotlar kabi ekinlarga sovuq -2-3°S sezilarli taʼsir etmasligini xabar qilgan.

Maʼlumot uchun, oʻtgan haftada Rossiyaning Yevropa qismida 36 soat davomida uzuluksiz qor yogʻishi va havo harorati keskin sovib ketishi holatlari kuzatilgan edi. Undan tashqari Rossiyaning janubiy hududlarida, Krasnodar oʻlkasi va Qrim yarim orolida ham bir necha yildan beri kuzatilmagan anomal ob-havo kuzatilgan edi. Xususan qor qalinligi 28 sm havo harorati - 10 darajagacha yetgan edi. 

 

Asosiy mavzular