Made in Uzbekistan - chet el mahsuloti bilan bellasha oladigan texnologiyalar taqdim qilindi

TOShKENT, 12 mar — Sputnik. Samarqand shahrida X innovatsion g‘oyalar, texnologiyalar va loyihalar hududiy yarmarkasi bo‘lib o‘tdi, deb xabar qilgan Samarqand viloyati hokimligi matbuot-xizmati.

Xabarda aytilishicha, ko‘rgazmada 30 ga ortiq muassasalar — O‘zbekiston Fanlar akademiyasi, Oliy va o‘rta maxsus, kasb-hunar ta’limi, Qishloq va suv xo‘jaligi vazirliklari tasarrufidagi ilmiy-tadqiqot markazlari, tajriba konstruktorlik tashkilotlari hamda Samarqand, Toshkent, Qashqadaryo, Buxoro viloyatlari oliy o‘quv yurtlari olimlari, mutaxassislar o‘zlarining 150 ga yaqin innovatsion mahsulotlari bilan qatnashishgan.

"Ular viloyatimizdagi dehqonlar, fermerlar, sanoat, kichik biznes va tadbirkorlik subyektlari xodimlariga o‘zlarining jahon andazalariga mos, yuqori samarali qurilish materiallari, texnik qurilmalar, preparatlar va boshqa ilmiy texnologik mahsulotlarini taqdim qildilar", — deb ta’kidlangan xabarda.

Yarmarkaning ochilish marosimida so‘z olgan Fan va texnologiyalarni rivojlantirishni muvofiqlashtirish qo‘mitasi ijro apparati rahbari O.Parpiyev, viloyat hokimining o‘rinbosari Sh.Xudoyberdiyev ko‘rgazmada namoyish etilayotgan sanoat, qishloq xo‘jaligi, sog‘liqni saqlash, farmatsevtika va informatsion texnologiyalar, fan va ta’lim sohalaridagi g‘oyalar, loyihalar mamlakat iqtisodiyotimini modernizatsiyalash, fan, ta’lim va ishlab chiqarish integratsiyasini hamda ilmiy mahsulotlarni yaratishda hamkorlikni yanada rivojlantirishga xizmat qilishini ta’kidlagan.