TOShKENT, 27-iyun — Sputnik. O‘zbekiston Prezidenti Shavkat Mirziyoyev 1-sentabr kuni nishonlanadigan mamlakat mustaqilligining 26-yillik bayramiga tayyorgarlik ko‘rish va uni o‘tkazish to‘g‘risidagi qarorni imzoladi, deb xabar qildi O‘zbekiston Tashqi ishlar mahkamasi matbuot-xizmati.
Respublika komissiyasi bir hafta muddatda "Fidoying bo‘lgaymiz seni, O‘zbekiston" degan bosh g‘oyani o‘zida mujassam etgan tashkiliy-amaliy, ma’naviy-ma’rifiy tadbirlar hamda targ‘ibot-tashviqot ishlari dasturini ishlab chiqsin", deb ta’kidlangan hujjatda.
Mazkur dastur 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi hamda "Xalq bilan muloqot va inson manfaatlari yili" Davlat dasturining ma’no-mazmunidan kelib chiqqan holda tayyorlansin, ta’kidlangan qarorda.
Respublika komissiyasi tomonidan Qoraqalpog‘iston Respublikasi viloyatlar, va Toshkent shahrida Mustaqillik bayramiga bag‘ishlab aholining keng qatlamlari o‘rtasida ma’rifiy uchrashuvlar, ochiq muloqot va suhbatlar, adabiy-badiiy kechalar, madaniy tadbirlar o‘tkazish maqsadida taniqli olimlar, ijodkor ziyolilar va san’atkorlardan iborat ma’naviy-ma’rifiy targ‘ibot guruhlari tashkil etish hamda ularning aniq reja asosida faoliyat olib borishini ta’minlash ko‘zda tutilgan.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
