TOShKENT, 10 apr – Sputnik. Harbiy xizmatga ketuvchilar maxsus tanlovlardan o‘tkaziladi, deb yozmoqda Adliya vazirligining Huquqiy axborot telegram kanali.
2019 yilning 4-aprelida qabul qilingan 291-sonli ukumat qaroriga asosan Chaqiriluvchilarni tanlab olish tartibi to‘g‘risidagi nizom tasdiqlandi.
Mazkur nizom chaqiriluvchilarni harbiy-texnika mutaxassisliklari bo‘yicha tayyorgarlikka jalb etish va muddatli harbiy xizmatni o‘tash uchun tanlab olish tartibini belgilaydi.
Tanlov chaqiriluvchilarning umumjismoniy tayyorgarligini baholash, kasbiy tanlov va yakka tartibda suhbat shaklida tuman hokimi qarori bilan tasdiqlanadigan Tanlov kengashi tomonidan amalga oshiriladi.
Tanlov chaqiruv yilidan avvalgi yilning 10-avgustidan chaqiruv yilining 10-fevraligacha o‘tkaziladi.
Tanlovda ishtirok etishda chaqiriluvchilarning soni cheklanmaydi.
Birinchi bosqich
Chaqiriluvchilarning umumjismoniy tayyorgarligini baholash quyidagi normativlar bo‘yicha o‘tkaziladi:
- turnikda tortilish;
- 100 metrga yugurish;
- 3000 metrga yugurish.
Mazkur normativlarni topshirmagan chaqiriluvchilar kasbiy tanlov tadbirlariga qo‘yilmaydi.
Ikkinchi bosqich
Kasbiy tanlov komputerda ishlanadigan 60 ta savollarga javob berish orqali tashkil etiladi.
Savollar maktab, kollej hamda litsey dasturlari doirasida tuziladi hamda savollarni ishlash uchun 1 soat 30 daqiqa vaqt beriladi.
Savol-javoblarning yakuniy bahosi monitorda avtomatik ko‘rinadi hamda kasbiy tanlovni takroran topshirishga ruxsat berilmaydi.
Uchinchi bosqich
Yakka tartibdagi suhbat videokuzatuv kameralari nazoratida O‘zbekiston tarixi, Amir Temur tuzuklari va boshqa ulug‘ ajdodlarimiz hayoti va faoliyatiga doir bilimlarni aniqlash orqali amalga oshiriladi.
Yakka tartibdagi suhbat yakunida Tanlov kengashi chaqiriluvchini harbiy-texnika mutaxassisliklari bo‘yicha tayyorgarlikka jalb etish yoki muddatli harbiy xizmatni o‘tash uchun tavsiya etish yoki tavsiya etmaslik bo‘yicha qaror qabul qiladi.
