AQSH generali axboroti: "Rossiya Tolibonni qoʻllab-quvvatlayapti"

TOSHKENT, 9 fev — Sputnik. AQShning Afgʻonistondagi harbiy kuchlari qoʻmondoni Rossiyani Tolibonni qoʻllab-quvvatlayotganlikda aybladi, deb xabar qildi RIA Novosti.

Jon Nikolsonga koʻra, Rossiya, Pokiston va Eron radikal "Tolibon" harakatini qoʻllab-quvvatlamoqda va bu bilan mamlakatdagi tinchlikka rahna solmoqda.

"Men avvalgidek ayrim tashqi oʻyinchilar, ayniqsa, Pokiston, Rossiya va Eronning taʼsiridan havotirdaman. Ular "Tolibon" harakatlarini qonuniy deb topib, bu radikal uyushmani qoʻllab-quvvatlamoqda va bu bilan afgʻon hukumatining Afgʻonistonda stabillik muhitini vujudga keltirish urinishlarini yoʻqqa chiqarishmoqda", — deb taʼkidlagan Nikolson. General shuningdek, sanab oʻtilgan mamlakatlarning ushbu harakati tufayli NATOning Afgʻonistondan koʻzlayotgan maqsadlari ham amalga oshmayotganini qoʻshimcha qilgan.

Moskva rasmiylari Afgʻonistondagi ichki mojarolarga aralashmasliklari haqida bir necha marotaba eʼlon qilishgan hamda ushbu mamlakat vakillari bilan aloqalari faqatgina mojaroni barham toptirishga qaratilganini taʼkidlashgan.

AQSH tomon ham Afgʻoniston hukumati va "Tolibon" harakati oʻrtasida muzokaralar boshlanishiga yordam berish niyatida ekanligini bir necha bor maʼlum qilgan, ammo davlatning bu boradagi urinishlari hozircha sezilarli natija berganicha yoʻq.

Eslatib oʻtamiz, 2001 yildan boshlab Afgʻonistonda AQSH va uning ittifoqdoshlari harbiy kontingenti faoliyat yuritmoqda. Ular terrorchilarga qarshi operatsiyalarni amalga oshirib, mahalliy xavfsizlik kuchlariga yordam berib kelmoqda.