TOShKENT, 29 avg – Sputnik. Toshkentdagi Riviera savdo majmuasida sodir bo‘lgan hodisa yuzasidan jinoiy ish qo‘zg‘atildi. Bu haqda Bosh prokuratura matbuot xizmati xabar qildi.
“Mazkur holat yuzasidan Toshkent shahar prokuraturasi tomonidan tegishli moddalar bilan jinoyat ishi qo‘zg‘atilib, dastlabki tergov harakatlari olib borilmoqda”, - deyiladi xabarda.
Eslatib o‘tamiz, Olmazor tumani, Nurafshon ko‘chasida qurilayotgan savdo majumasi binosining metal bilan yopilgan tom qismi qulab tushishi oqibatida qurilish-ta’mirlash ishlarini bajarayotgan 4 nafar ishchilar og‘ir turdagi tan jarohatlari olib, vafot etgan. 2 nafar ishchilar esa hodisa joyida bo‘lgan fuqarolarning ko‘magi ostida shifoxonaga yotqizilgan.
SSV xabariga ko‘ra, jarohatlanganlar zudlik bilan tekshiruvlardan o‘tkazilib, belgilangan tartibda shoshilinch tibbiy yordam ko‘rsatilmoqda. Jumladan, O.Sh. o‘ng tavon suyagining sinishi tashxisi bilan o‘rta og‘ir ahvolda, Z.R. esa aralash travma, chap yelka suyagining sinishi tashxisi bilan yotqizilgan.
