TOShKENT, 19-may — Sputnik. Shavkat Mirziyoyevning kitobini o‘rganishga bag‘ishlangan targ‘ibot tadbirlari o‘tkazilayotgani haqida "Jahon" axborot agentligi xabar berdi.
Qayd etilishicha, O‘zbekiston Respublikasi Madaniyat vazirligi, Oliy va o‘rta maxsus, Xalq ta’limi vazirliklari, Yozuvchilar uyushmasi, Ma’naviyat targ‘ibot markazi va boshqa tashkilotlar hamkorligida tashkil etilayotgan tadbirlarda kitobda ilgari surilgan g‘oyalar, davlat va jamiyat hayotini yangilash bilan bog‘liq vazifalar haqida hayotiy misollar asosida so‘z yuritilmoqda.
Narpay tumanidagi Oqtosh tadbirkorlik va servis kasb-hunar kollejida tashkil etilgan uchrashuvda hududdagi mahallalar vakillari, o‘qituvchi va o‘quvchilar qatnashdi.
Taniqli adiblar, madaniyat va san’at namoyandalari, professor-o‘qituvchilardan iborat targ‘ibot guruhi a’zolari O‘zbekistonda inson manfaatlari yo‘lida amalga oshirilayotgan islohotlar samaralari, shahar va qishloqlarimizdagi bunyodkorlik jarayonlari, yoshlar, xotin-qizlar manfaatlarini himoya qilish borasida olib borilayotgan ishlar haqida ma’lumot berdi.
Bu borada prezident kitobida belgilab berilgan ustuvor vazifalar yuzasidan mulohazalar bildirildi.
Uchrashuvda mahalla oqsoqollari, ziyolilar so‘zga chiqib, aholining tadbirkorlik tashabbuslari qo‘llab-quvvatlanishi natijasida bugun qishloqlarda shaxsiy yordamchi xo‘jaliklarda parrandachilik, chorvachilik izchil yo‘lga qo‘yilayotgani, odamlar o‘z tomorqasidan unumli foydalanib, daromad qilayotganini ta’kidladi.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.